Easter

Posted by

Hey aw, wissin a guid Easter tae aw o ye.

It's guid tae see the new front page o the site takkin shape, I maun say it luiks braw, daes it no? Guid tae see the YouTube channel an picturs section up, I ralley like the wey the site's gettin mair multimedia aw the time. Verra nice indeed. Speakin o picturs, that minds me - gin ye see Scots uissit i things like street signs, shop names etc. please tak a pictur an send it in tae the site tae pit up. I hae a hantle mair tae send gin I can jist wark out whit wey tae wark BlueTooth... whit a fankle!

Yesterday up on Blackford Hill wir kirk haed wir annual eirly mornin Easter service - an wis it no jist a braw day? Last year we haed snaw, maist years gin it's no snell it's at least dreich, wi sang sheets fleein about i the wund. Nane o that on Sunday it wis as still as.... still as.... still as a verra still thing, oniewey. Aince mair ma faither read frae Lorimer's Scots translate o the New Testament (mind an check out the readins on the hame page), this time wi encouragement frae fowks aforehaun, he'd speired gin they wantit it i Scots or Inglis. Scots it wis - an the reactions o fowk tae hearin it wis hairtsome tae see. They didna see the wark as a joke, or as something couthy an quaint - they ralley lissened tae whit the readins haed tae say, an that wis rare tae see.

Aw the best,
Dunc


Sang o the Week: The Beatles - I am the Walrus.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre