New fundin, internet, Dictionars

Posted by

Weil, first o aw, I maun say weil duin tae the fowk at the SLC an the Dictionars that haes at lang an last got the govrenment tae fund thaim direckly raither nor through the Airts Council. Gin ye missed it, tak a keik at the News section an ye'll see that frae this October, baith o thir organisations wull get their siller struacht frae Holyrood. Nou that we'r lowse o the Airts Council, I howp we can see the twa win on i the michty darg they'r baith daein for Scots. It's also wurth takkin a butcher's at Scots Language Dictionaries' site tae see their tak on it - guid news aw roun! (http://www.scotsdictionaries.org.uk/News/index.html)

On a relatit pynt, congratulations tae Mike Russell on his promotion, an here's tae a fruitfou relationship atween the new cultur meinister an the SLC.

Haein mentioned the Dictionars, this seems like a guid time tae mind fowk that Scots Language Dictionaries is aye leukin for mair fowk tae dae volunteer readin an donate beuks tae help wi the reveision o the Concise Scots Dictionary. For mair information gae here: http://www.scotsdictionaries.org.uk/Projects/wordCollection/ReadingScheme.html
Bascially ye gae throu a beuk an unnerline Scots wurds an turns o phrase wi a pencil, mak a wee leet o the pages ye funn thaim, an this helps thaim tae keep track o whit wurds is uissit, whaur, gin they hae chyngit in onie way, whit wurds has drappit out an whit anes hae come in tae wir leid syne the CSD cam out i 1985. Weil wurth daein gin ye hae the time.

Lastly, tho I dout maist o ye ken o this awreidy, ther'r a campaign tae get a .scot wab domain on the internet. Earlier this month the Scottish Parliament's Public Petitions Committee votit unanimously tae support the campaign. Nou that the Scots Parliament an the Scots Govrenment hae supportit the campaign (efter ainlie nine month fouly up an rinnin), a formal application tae the Internet Corporation for Assigned Names and Numbers isna faur aff. For mair, see here: http://www.dotsco.org/


That's aw for nou, cheerio an God Bless.

Dunc


Sang o the Week: Guns N' Roses - Street of Dreams. Is it the rale GnR wiout Slash? Wis it wurth the wait? Daes onieane tak this sort o owerblawed rock seriously onie mair? Daes onie o that maitter? This is ae braw sang, an at least the equal o onie o the ballads on the Use Your Illusion albums.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre