SIMMER SANG

Der shadows quietly creepin

in ower da watter noo;

Da peerie flooers is sleepin,

dir faces washed wi dew.

Da calm an paece o Simmer

is settled ower da laand,

As trowe da scentit hömin

we waander haand-in-haand.

Tho Simmer flooers’ll widder

afore da winter snaa,

Wir love fir een anidder

dat sanna fade awa;

An hit’ll mak nae differ

whin A’m across da sea,

Wi mony a day ta lippen

till I win back ta dee.

Fir du, my lass, can gie me

a vision an a draem

At I can kyerry wi me

whin A’m sae far fae haem.

Wi days o storm an tempest,

wi nichts baith mirk an grim,

A’ll see dee ida hömin

at lichts da Simmer Dim.

A’ll see da colours spreadin

up fa da risin sun,

Da gold an rose-red cleddin

da day at’s jöst begun.

A’ll see da Simmer moarnin

sae blue an gold an fair,

An see dee ida sunsheen

at’s glansin ower da ayre.

Da spinnin Eart keeps turnin;

da Saisons dey geng by;

Da flame o love keeps burnin

wi rainy days an dry.

Eence mair ta be aside dee

A’ll sail across da faem,

An watch da Yöle-star blinkin

an kyin A’m comin haem.

Vagaland