Nithin tae dae wi leids

Posted by

Weel, wi yon swatch o guid wather in September A hae graipit aw ma tatties oot the grun, an thay’r nae baud leukin. A aye growe Pentland Dell is thay wir the furst tattie A kent o whan A wis a hauflin an wirkin it “Pentlandfield Plant Breeding Station” nar Embrae, whaur aw the Pentland kins cam fae.Thay wur a main-crap tattie, lang-set mair is roond, wi a white skin an a yellae bodie. Maun thay wur a braw dry-moothed tattie, best bilt, hail-skinnt an champit wi a daud o butter, nithin muckle bates thaim.

Sae whit haes tatties got tae dae wi the Scots leid? Nithin! – bit neither hae grosets an thay hae bin awfie guid back in the Simmer tae. A taen ower thirty pund aff yin o ma busses – richt hingin thay wur, muckle yellae hinnie-blobs o shuggary watter. The auld wife makkit ferr ower monie jaurs o groset jeelie wi thaim, bit haen a piece on jeelie whan the snaws theek roond the gairden an the frosts ir pentin picters on the windaes, gaes yer wame a guid sauch an lichtens up a dreich day.

A’m juist waitin on the chimley soop tae caw in, bit heez aye ahint time is uswal – sirplin tea an bletherin tae yon wifies doon the Crescent, nae doot! Ma fire haes bin reekin fur a day or twa an A jalouse the grannie on tap o the lum-can haes shiftit or the suit haes beilt up in the lum, an needs a guid soop. Onieweys A thocht A wad hae Chairlie leuk it ower afore the cauld wather taks haud, an A yaise the suit fae the lum tae hinner the cairrot-flee in the gairden neixt year. Blecks the new GREEN!

A hear chappin on the door sae A’ll awa afore e caws it doon.
Ta – ta the noo.

Iain.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre