Shug wis fleein awricht

Posted by

A’m back wi a wee bit crack fae the bygane. Oor auld chimley-soop Hugh McLeod deid monie year syne, an A mind o lang-luggin this crack ower the gairden dyke atween twa auld sweetie-wifes, hingin oot thair washin.

“Ay. It wur juist lik auld Shug tae dee an nae lat on, an aw yon fowk wantin thay’r lums soopit afore the Wunter.”
“Ocht e wis a ill-thrawn auld skellum, aye wi the crack fur the weeman.”
“E wad be sookin up tull the meenister richt eneuch.”
“Ay, an chairgin a guid amoont o siller anaw.”
“Wis e up on the ruif whan e fawd aff?”
“Ay, aw the wey aff the lum-heid – A’m telt!”
“E wadnae ken oniethin aboot it mind, stottin fou maist lik. Thay say e wis splairged aw ower the Manse staps – deid afore e hit the grun.”
“Ay. Heez bodie juist misst fawin on the Reverend’s dahlias. Auld Rev. Roger daes lik heez dahlias, it wad hae bin a peetie tae flatten thaim afore the Flooer Show.”
“Whan is the fooneral onieweys?”
“Its on Thursday neixt. Ay, Thursday it eleeven, thits whit Maggie telt iz yisterday.”
“Shae wad ken! Daes shae nae claen up it the Manse?”
“Ay, an mair gin A’m telt richt! Thay say it tak hir twa oors tae screenge aw the bluid aff the stane staps – fair jeelt it wis.”
“Ay, weel A’m nae yin fur the causey-clash is ye ken, bit you hing on tull hir guidman gits wind o whit oor Babs telt iz! The wey Maggie cairrit on fornent oor hich an michtie Rev.Roger, an im a merrit man!! Oh A hae a reid face juist thinkin on’t, an the Reverend’s guidwife nae-weel in bed – the hussy!!
“Sae whit did Babs tell’e thin?”
“Oh A coudnae say it ower agane, bit mind-----------------.

Mind an hae yer lum soopit afore the Wunter!

Ta – ta the noo,
Iain.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre