It wis uphull baith weys

Posted by

Guid tae be back. It’s bin anither thrang weik, bit A’ll threap twa threads fae ma weik tae be gaun on wi. Thare’s a eild sang “yer nae ower eild tae lairn summit new” A hae bin bletherin awa wi monie fowk in the Scots leid ower the bygane, bit the ither nicht, juist on ma wey oot fae a neibours hoose, efter a guid crack an twa-three wee drams tae slocken the thrapple, A speirt the curn o couthie freens tae drap iz a e-mail in Scots aboot thair expairiences it hairst-time whan thay wur bairns,an A wad stert a
collection.
“Naw. Oo cannae wirk yon computers richt, thay dinnae prent oniething in Scots”
“Bit ye ootpit screivins tae iz aw the time” A haed a kittlet leuk on ma dial.
“Ay, in Inglis! Oo’ve niver seed the Scots wirds writ doon an wadnae ken whit thay leukit lik” Sayed yin eild wifie, “Ir oo alood tae yaise thaim noo oniewey?”
A wis dumfoonert! The Scots eddication haes a awfie amoont tae mak up on.

Noo wi ower saxty year o cawin the crack in Scots A hae aye thocht the Scots leid alphabet wis the self-same is the Inglis. It wisnae tull A veesitit the “Poetry Leebrary Open Day” in Embrae lest Setterday thit a furrin lik wumman (a cockney bi the soond o hir lood vice) speirt iz aboot ma Scots dialect an whit wey it wis different fae hir Inglis.In parteeclar, shae askit gin the Scots haed its ain alphabet? A wis scunnert it masel fur naw kenning the truith, an taen a richt reid facer whan shae askit iz fornent a thrang o ootrals. This wis afore A hankit on a fou coat-staund an the hail jing-bang cowpit ower ontae the flair, makkin a terrel stushie. A didnae stey lang efter, bit makkit ma wey oot, nae doot tae the pleesure o aw the wad-be makers.
.
Hoo-ivver wi a bittie howkin on the wab A foond this airticle anent the Scots alphabet ---notes fae Chris Robinson o the Scottish Language Dictionaries. Leuk it up gin ye hae onie farder interest.
.
A’ll nae haud ma wheesht ower lang afore A’m haiverin agane.

Ta – ta the noo.
Iain.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre