Back tae schuil

Posted by

Weel its bin a whilie fae oor lest blether, an A’m gled tae fun yer stull oot yonder. It’s braw tae sei the new Facebook site fur the Scots Leid an A wint tae thenk Michael Hance fur heez sair wrocht in stertin it up. Thare’s noo ower a hunner fowk jyned up, sae A cannae wait fur the gabbin tae stert.

His aw yon rain nae scunnert awb’dy? The gairdens ir growin rank an the sile clags on yer buits whan ye stert oniethin lik pouin rack or champin kale-wirms. Oniewey aw ma wee soople helpers ir awa back tae schuil an A howp nane o thaim hae a “Archie Dodds” in thair clesses, is A haed, sic is this extrack fae a “Iain an Trev” short story.

“Archie Dodds wis a eediot. Ither laddies it the schuil thocht e wis a heidbanger or a dingle, an wad hae nithin tae dae wey im. The ootcome wis Archie nivver haed onie maiks it schuil or it hame, an is e wis the ae bairn tae twa pawrents thit wur aye blin fou o the John Barleycorn, e gaed aboot hissel. It schuil e aye wintit tae be the mids o onie dieveltrie gaun on, an wi the stushie thit fallowd it wis heez wey o gaitherin ither fowks thochts an makkin thaim tak tent o heez ploys. E haed a particularity in the wey e ackit thit makkit iz jalouse e wisnae richt in the heid or wis e takkin the rag oot o the maisters in a clivver wey. E micht juist be glaikit an nae ken whaur tae stoap yince e gotten the attent.”

A’m share oo aw ken a Archie, bit it daes mak schuil sair gaun fur bairns wintin tae lairn, an it gies a lift tae the yins fallowin in the weys o Archie.
A’ll gan ower an hae anither leuk it aw the jobs A micht dae afore the Winter.
Ta – ta the noo, sei ye suin.
Iain.

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre