Romania, Romanian an Scots

Posted by Duncan

I’d lik tae gie a walcome tae wir newest blogger, Sophia Pangloss – I can see she’s been fell thrang wi bloggin awreidy.  Guid tae hae ye onbuird the guid ship SLC, Sophia, an I leuk forrit tae readin mair frae ye.

Weill, that’s me back frae ma holidays i Romania this week.  It’s a bonnie kintra  - luvely mountains, forests, castles...  I didna get tae the Danube delta or the Bleck Sea, but it seems there’s a bittie for awbodie there – specially fowk that likes guid fuid!  That minds me, I maun be aff tae the gym later on...

There’s a bittie there for Scots-leid anoraks an aw, or at least Scots-speakin etymology anoraks (an wha isna?).  I jalouse I wrate a whilie back that Romanians cries a corbie a “corb”.  We hae ither wurd i common an aw – either common tae Indo-European (it micht no leuk like it, but “peşte” an  “fush” is faur aff kizzens) or wurds baith haes taen frae Laitin (Romanian “celebra” leuks no sae deifferent tae “celebre” [i.e. celebrate] that kythes i DOST.  Ither wurds we baith skares comes frae Romani, as we micht cry a bodie a “gadgie”, Romanians taks the Romani loanwurds “gagiu” (“cheil”) an “gagica” (“lassie”).   I the ae wey, we hae “chore” an they hae “a ciordi”, also frae Romani.  It’s the same in Urdu an aw.

While we’s at it, the SLC haes an innin i Romanian, sae gin ye hae freins or co-warkers frae Romania, send thaim the link tae: http://www.scotslanguage.com/articles/translations/2000

That’s aw for nou,

Cheerio,

Dunc

 

Sang o the Week: Korpiklaani - Könnin Kuokkamies

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre