Census - nou the wark ralley stairts

Posted by Duncan

Weil, first I’d lik tae say walcome tae Margaret Tong – I’m ralley luikin forrit tae readi mair o yer blogs, Margaret.

 

The muckle news for Scots raicently haes been the 2011 Census.  Efter a lang darg, at lang an lest Scots’ll hae the same respeck as Gaelic an Inglish i the census.  O course, this isna the same thing as equal respeck i the media, eddication, the job merket an sae on, but it’s a stap i the richt direction, ane dout about thon. 

Gi n naething else, for the first time fowk in ilka hame i the kintra wull be obleiged tae think for a wee about whit Scots is – makkin it like as no the biggest linguistic consciousness exercise Scots haes e’er haed.  O course, thon’s whaur we maun mak shair fowk kens whit Scots is, an howpfouly the wark the SLC is daei wi GROS wull dae the job – but o course the lave o us maun dae wir pairt an aw.  Gin there wis e’er a time tae no be blate about Scots this is it – blogs, message buirds, Facebook, letters tae the papers an aw the lave.  Gin the census shaws a guid nummer o Scots speakers, readers etc. i the kintra it’ll gie wir caws for mair Scots in eddication, braidkestin etc. mair wecht.

 

There shair is a guid hantle Scots curns on Facebook (maistly for regional dialecks), sae I howp we can wark throu thaim tae better co-ordinate pittin the wurd out about whit Scots is.

 

Aw the best,

Dunc

Sang o the Week:  Mortolea - Fata Padurii

blog comments powered by Disqus

The opinions expressed here are the views of the writers and commentators and do not necessarily reflect the views and opinions of the Scots Language Centre